AZERAOSE AAD PRINSE

 

Daag van de nuuje AAP, zondaag 8 januari 2017


Dit jaor waas ut de beurt aan prins Jeroen I (Theelen) om veur ut eerst mit te gaon met de Azeraose Aad Prinse. En zo wie ut zich eine gooie nuuje AAP betaamt waas hae als eerste aanwezig bie de Keizer same mit AAP Dennis I. Op de zaoterdig van teveure haaj ut versjrikkelik gevraore mit iezel en spegelgladde waege en sjtoep. Gelukkig haaj op zondignach de dooi ingezat en kos eederein zonger al te veul gevaor de waeg op. Op deze morge doon veul miense de vlag van de Nachtegale ophange. Auch Ton Clercx zorgt det de vlag waert geplaatst, daoveur haet der eine Klussenier ingesjakeld.

Veurdet veer op waeg kinne mit de AAP mot eers contributie betaald waere biej Jan Verheesen. Bliekbaar waas der ein verhoging van de contributie van € 11,- nao € 15,- (maar leefst ein verhoging van 36%!!!). Toch wilt eederein gaer biej de AAP heure want ze weete neet wie sjnel ze motte betale!!

De morge wirt begos mit ein serenade onger ut raam van Maike en Geert. Pieter Classen zit ut leed “Loewende Klokke van Limburg os Landj” in. Bliekbaar waas Maike al veurbereid, want ut kwoom in ochtendjas nao boete en goof de AAP ein rundje sjroebeleer.

Eindelik koste veer vertrekke. En onger ut genot van ein pilske en get eier waerde der veul sjaele zeiver gedaon. John Rademakers haet waal ein half oer gespraoke euver ut feit det der ein nuuj brilke haet. En eigelik neet ein nuuj, maar zeker 6 nuuj brilkes. En hae haet die neet biej Sjpecsaevers gehaold, maar urges angers. Want biej Sjpecsaevers kost ein brilke € 527,- en biej dae angere kreeg hae der 6 veur € 517,-.

In Hirkebosch aangekomme moog Jeroen I gaon raoje waem de aape zeen die dao zitte. Nao inkele vraoge is hae der toch achter gekomme det de aape mam (Marleen) en pap (Pieter) zeen. Natuurlik krege veer dao auch nog effe ein versjnapering (wors, kees en sjroebeleer of jaegermeister).
Biej de Huifkarhoeve aangekomme hubbe veer lekker sjpek mit eier gegaete. En nao ut aete sjtonge der plotseling 4 supermanne (Dennis I, Cletus, Juul en Pieter). Zelfs Pieter Classen haaj ein ech supermanpak aan. Door heur waerde teruukgeblik op ut aafgelaope seizoen van prins Jeroen I en alles wat der waas gebeurt. Maar leefs 8 kentjes waare volgesjreve.

Nao de veurdrag waere nog ein paar pilskes gedronke en ginge veer weer teruuk op waeg nao de Keizer en vervolges natuurlik nao de Aapeheul in de Duup.