AZERAOSE AAD PRINSE

 

Daag van de nuuje AAP, zónjig 6 janewarie 2019


Dit jaor móch prins John II (Aarts), auch waal Bölke genump, mèt de AAP mèt op de Huifker. Zo es idder jaor waert d’r begónne mèt ‘t zinge van ós Aapeleed. Mer veurdet veur dao aan kóste beginne mós Pieter eers nog effe ein eike aete. Die woore door AAP Eric I geregelt. Dit jaor verleep ‘t zinge van ós Aapeleed gelökkig vlekkeloos, dus zónger óntveuring en allerlei vluchauto’s die oet ‘t nieks versjiene. Dit beteikende det veer rustig koste beginne aan os reis nao de Huifkarhoeve. Onger waeges natuurlik de gebroekelike sjaele zeiver.
Aangekomme bie de Boshut van Sjtaatsbosbeheer in Hèrkebós kènne veur oetsjtappe en moog John II raoje welke twee verkleide aape d’r veur hem zitte. AAP John I Rademakers lik oet aan prins John II det der vraoge moog sjtèlle en det de aape allein jao en nae moge knikke. Eine zeer oetgesjlaope AAP Wilbert I merkt geliek op det nae knikke neet geit. En inderdaad is de bedoeling det der nae gesjud mót waere. Hiejnao begint prins John II mit zien sjpervuur aan vraoge:
- Komp geur oet Azerao?
- Bösse eine man of ein vrouw?
- Bösse getrouwd?
- Höb se ein relatie mit eemes van de raod?
- Höbse mich de fles gegaove?
- Woonse oppe Durpssjtraot?
- Woonse tösse de Sjprunk en de hei? (sjtök Dörpssjtraot ingekort!!!)
Oeteindelik wis Prins John II te raoje waem d’r in de aapepakke zoot, namelik zien zus Bianca en zien mooder. Daonao haaj AAP Andre I nog get good te make mit Astrid Rademakers. ‘T is namelik zo det se zonger lid gein lid kins waere van AAP, maar zónger de óngesjteuning van Astrid woore sommige zaken neet geregeld/gelök. Dus vanoet AAP waerde ein bleumke en ein doos Merci aangebaoje.
Nao ‘t nuttige van get heerlike wors en kees en natuurlik eine Jägermeister of Sjroebeleerke gaon veer verder nao de Huifkerhoeve. Biej de Huifkarhoeve aangekómme zeen veur det de adjudante al aanwezig zeen en zelfs al ‘t ontbijt (sjpek met eier) höbbe gehad. Maar det weerhilt heur der neet van óm nog eine keer det zelfde óntbijt te besjtèlle!!!
Noa de sjpek mit eier en get te drinke mooge Pieter en de adjudante Richard en Robert Lomans beginne mit de veurdrag (deze kint geur kieke via deze link: https://www.youtube.com/watch?v=q2Ig1DwSQ4o
Nao de veurdrag waere nog ein paar pilskes gedrónke en ginge veur weer teruuk op waeg nao de Aapeheul in de Duup.