AZERAOSE AAD PRINSE

 

Vriedig 11 september.

Eindelik is ’t zo wiet. Nao ein geheimzinnig veurtrajek, woo veur kòste raoje woo veur haer ginge eindelik dan de ontknuiping.  De AAPe die aan ’t reisje mét deeje ginge mét eige verveur nao Vènraoj en waerde op ein sjoon meneer muzikaal welkom geheite in hotel Asteria door de organisatore, Pieter en Marcel.
’t Zunke sjeen, dus sjnel de kòffer nao de kamer, en truuk nao ònger, wo veur mét de heel bubs lekker op ’t terras höbbe gezaete. De Hertog Jan sjmaakte euverheerlik. Om 7.11 oer kòste veur aansjuuve - in zaal Amsterdam, dae sjpesiaal veur oos woor gerezerveert – veur ’t aovendaete. De heere mèt sjteek, waemeske en sjpelt, en de dames met heutje. De heere mòste oet ein blauw deuske en de dames oet ein raos deuske ein kaertje pakke. Hiej sjtòng eine sjpreuk van eine Prins op. Op taofel looge allemaol foto’s van aad prinse. Noe kòs ze aan taofel gaon zitte biej de foto wo dae sjpreuk biej paste. Zo kreeg se ein fein gemikste taofelsjikking van junkske-maedje, junkske-maedje. Veur de variasie waerde det nao iddere gank herhaolt, woodoor se ein nuuj taofelbezetting kreegs. Nao ´t aete woor ´t tied veur ein sjpelke. Kiene, mer dan op ein sjoon meneer. Nao ´t kiene waerde ein geluidsbox op taofel gezat en haet Dennis II oos van meziek verzeen en uiteraard nog ziene sjlager gezonge.
Om 12 oer sjloot de tap.  Op ein paar nao – die haaje nog dors en honger en besjtelde eine taxi nao Venraoj - ging idderein nao bed.
Zaoterdig 12 september.
Vanaaf 9 oer aansjuuve veur ’n sjtevig ontbijt. Hie waerde nog letterlik en figuurlik flink opgesjöp. Om half 11 ginge veur in centrum Venraoy nao herberg “De Klomp”. Evenementburo Nika Actief tracteerde oos dao op eine zeuktoch nao eine mäördeneer door ’t centrum van Vènraoy. Aan de hand van GPS en foto’s moste veur lokasies zeuke en vraoge beantjwaorde. Met gooj antjwaorde kòs men de mäördeneer ontmaskere. Truuk biej herberg “De Klomp” waerde de winnaar bekénd gemaak en koste veur “geneete” van ein lekker tas soep en breudjes. Hiejnao haaje veur nog get vrieje tied euver om in ’t centum te sjoppe of ein terrasje te pikkke.
Óm 7 oer koste veur plaats numme in eine zaal van ’t hotel veur ein geweldige diner-show. Auch hiej kwoome veur nieks te kort. As te lang gewach mos waere op ein glaas beer, kòs se dich nog altied te good doon aan de wien dae oppe taofel sjting. Lilian Körver (vriendin van Alwies) waerde nog verras mét ein vuurwerkfontijn op ’t toetje omdet ’t jäörig woor en waerde door de ganse zaal lang zal ze leven gezònge. Omdet Pieter en Marcel wiste det Philo om 12 oer  jäörig woor, waerde nog ein klein verjäördig feesje gehaaje in de bar van ’t hotel. Dao waerde eins joon taart aangesjneeje en gezonge. Òm ’t feesje kompeet te maake, dijlde Philo hiej veur allemaol sjnoepzekskes oet. Òm 2 oer sjloot de bar, mer dao woor toch neemes meer dae d’r neet genog gehad haaj.
Zonjig 13 september.
Veur kòste good oetslaope omdet veur pas om 11 oer aan ’t ontbijt hoofde te zin. Eers de kòffers in de auto en toen nao ’t ontbijt. Ontbijt… dit woor ontbijt, lunch en diner biejein. Van breudjes toet werm en kaat bufet en det in 5 geng. John noom nog effe ’t waord, en bedankte Pieter en Marcel veur de geweldige organisatie. Omdet ’t zo good gesjlaag woor sjtinge ze al geliek op de nominatie om det de volgende keer weer te organizeere. Wie veur oos nimmer kòste bewaege van ‘t aete zin veur nao boete gerold en höbbe nog lekker op ’t terras in ’t zunke gezaete. Veur en nao noom idderein aafsjied en ging vòldaon nao hoes.

 

Klik op foto voor filmpje