AZERAOSE AAD PRINSE

 

Òmdet ’t zo sjoon woor.

Op de jaorvergadering van 2007 waerde gevraog of de AAPe-wien nog neet op woor, zodet d’r weer nuuje gehaold kòs waere. Hiejoet bleek det ’t weekendje nao Willinge zo in de sjmaak woor gevalle det d’r weer behoefte woor om nog èns gezamenlijk op sjtap te gaon. John en Andre waerde bereid gevonje om ’t reisje nog èns te organiseere. t Woor de bedoeling om richting Cochem te gaon. Helaas (of gelökkig) woor in Cochem gein hotel te vinje veur de opgegaeve 41 persoone en höbbe ze kontak opgenaome mêt hotel Brügges Loui in Usseln biej Willinge. Hie kòste veur op 13 en 14 oktober terech, zodet ‘t veur die AAPe die de veurige keer mêt zin gewaes ein herhaling waerd. Dao woor helemaol neemes kwaod om. Dus vertrok de bös op zaoterdig nao ein Azerao’s keteerke richting Willinge. De reis verleep veursjpoedig, toet d’r ein òmleiding waas en veur nao 3 keteer weer op dezelfde plaats oetkwoome as 3 keteer eerder. Oeteindelik waerde veur nao 5 oer rieje welkom geheite door de familie Jäger in ’t hotel. De breudjes en de koffie sjtònge al klaor dus sjnel de koffers op de kamer gedump en aangevalle. Nao ’t aete ging ’t  weer de bös in en ein paar kilomaeter truuk nao Willinge. Omdet ’t al zo laat woor bejloote de meiste òm neet meer de Ettelsberg op te gaon en waerde veuraan in Willinge oetgesjtap biej kefee Zum Schiff. Eine groep bleef hiej hange en de res ging nog Willinge in. Veur en nao kwoome d’r al meer nao kefee Zum Schif woo ’t baere gezellig woor. Om half zeeve vertròk de bös truuk noa ’t hotel woo veur oos kòste opfrisse om aansjloetend om ach oer in de gezelligge bar van ’t hotel aan te sjloete veur ein bufet det verzorg waerd door de hoteleigeneer en kok Karl-Heinz Jäger. Daonao höbbe veur noch toet in de late uurkes naogekeuvelt.

 

Zonjig 14 oktober Waerde op tied de kòffers gepak en koste veur aansjuuve veur ein sjtevig ontbijt. Nao ’t ontbijt waerde òm òngeveer half elf de kòffers in de bös gelaaje en waerde nog ein groepsfoto gemaak. De bös ging weer richting Willinge om op de parkeerplaats aan de voot van de Ettelsberg te parkeere. De meiste kochte kaertjes veur de sjteulkeslif en toen ging ’t  bergop nao Ziggi’s Hutte. Òmdet veur al zo vreug baove biej Ziggi woore, kreege de dames nog ein fein plekske inne zon, en de heere binne en boete ein sjtaontaofel. Driek veulde zich al drek thoes en begòs al met die half lieters te sjleipe. Auch de dames haaje ’t al gauw gesjaote, en besjtelde zich ein paar tejers met wors zo lank as eine sjtoeptegel. Dao kwoom natuurlik ’t neudige kommentaar van de heere euver, mer det ken ich neet opsjrieve want det kump neet door de senzuur. Ziggi vònj òs waal erg gezellig, want vlak veur det veur woole vertrekke kwoom d’r nao boete en bloos d’r op ein sjlang mét trechter nog “Overal, waar de meisjes zijn…”. Òm drie oer ging ’t weer in de sjteulkeslif òmleeg woo veur òs verzamelde met die waat in ’t dorp woore gebleeve, de bös in en richting Azerao. Nao de neudige plaspauzes kwoome veur in Elmp aan biej Gaststätte  “Zur Post” veur ’t aafsjieds dinee